الجمعية هاذي خـَدّمتْ أكثرْ من 10 إطارات شابة وأعوان ما بينْ 2002 و2009 وأغلبيـّتـْهـُم من حاملات الشهائد العـُلـْيا، وبرّة امـْشيوُ أسـْألـُو وَحدة خدمت في الجمعية وكوّنـّاها ورقـّيناها، واهايـْكا توّة عمـْلتْ مشروع مـْتـَاعْ لمـّانْ زبلة وتخدمْ على روحها، وهي بيدْها تـْخدّم في ناسْ في الشرِكة مـْتاعـْها ، بخـْلاف الأخرينْ اللـّي كلّ واحد شادِدْ خدمة، في الوظيفة ولاّ خارج الوْظيفْ.

هذا غـَيـْضْ من فيـْض فيما يخصّ رصيد ها الجمعية اللـّي خدمتها رجال ونساء أصيلين، وجاو ناسْ انتهازيين وْبعـْثـْرو أوراقـْها؛ والغلطة من رئيس الجمعية اللـّي عطا ثقة أكثر مِ اللازم لـْناسْ، شباب وكهول، ما يستاهلوشْ: خانوا الثقة، وخانوا الأمانة، وما شافوا كانْ مـَصالـِحـْهم الشخصية والسياسويـّة...والبونـْتـُواتْ...

ويـْقول القائل علاشْ ها الجمعية في الوقت هاذاكا بالذاتْ، وبعد مسيرة موفـّقة سنواتْ، وبعد مـَعالـِمْ النجاحْ هاذيكا الكلّ صارت النكسة؟

المـُشكل هو آنـّو لمـّا يـِتـْعلـّق الأمر والمـُعامـْلاتْ بـْرجالْ بين بـْعضـْهـُم تـِتـْحلّ، وبين نساء بينْ بـْعضـْهـُم تتحلّ؛ أما وقت اللـّي تكون المسألة فيها نساء ورْجال تولـّي العـَملية حسـّاسة، على خاطر تولـّي تـُهـَمْ من نوع آخر (أخلاقية...) وبـَرّة فـُكـّها عادْ... الجمعية كان ديما فيها خلافات، ووجـْهاتْ نظـَرْ ومصالح مـِتـْضارْبة، لكن ديما كنـّا نـْسلـّكوها بـْشوّية صبر، وشويـّة حكمة، وشويـّة بيداغوجيا. آما كيف ولاّت فيها رْجال ونـْساء، ختـْمـِتْ وبرّة ! خـُصوصا أنـّو قـُلـْنا نشجـّعو المـْرا والشباب... وركـّبوهْ على....، مدّ ايدُو للشـّواري... وزيدْ محاولاتي إرساء تقاليدْ إدارية حـِرَفيـّة في الجمعية كانتْ ديما تلـْقى التعطيلْ من الداخل (فمـّة شكون كانـِتْ تـْخطـّط لـِبـْعيدْ، والحجـّة على ها المـُعطى تقراووها في عقد بين شركة متاعْ شخص كان في الجمعية ومؤسسة عمومية...).

المهمّ، هاذا الكلّ مـْوثـّقْ في تقارير-كـْتـبْ، وفي الحواسيب (رغم اللـّي آخر مسؤولة خـَدّمناها في الجمعية مـْشاتْ مـَسـْحتْ المـُعـْطـَيات متاع الجمعية اللـّي عندها الكلّ في الحاسوبْ، وثمـّة زوزْ شـْهودْ على العمليـّة، ومعـْروفينْ). وتاوْ ايجي الوقـْتْ وكلّ شيْ نـْورّيـُوهْ، كيما جاء الوقت باشْ دوّنـّا المعطيات هاذي الكلّ ونشرناها للعـُمومْ.

وتـْقـُلـّي، مـْليحْ، توّة العملية من داخل هايْ بايـْنة: الغيرة، والبـُغض، والبونـْتـُواتْ، والطـّمعْ، والطموح الجامح. آما آشْ مدخـّل الخارج في الحكاية؟

هـْنا ما نجـّمـْش توّة نقول كلّ شيْ. آما ثمـّة مسؤولين كـْبار اكتشـَفـْتْ، من خلال نشاط الجمعية وإشعاعها، أنها ولاّتْ تـْقـلـّقـْهـُمْ: حـُضور إعلامي كـْبيرْ،مصداقية كـْبيرة، علاقات دولية واسعة، تمويلات... الجمعية ولاّتْ الناسْ تـُغـْزرِلـْها بالاحترام والتقدير الكـْبيرْ !

تي شـْبيكْ: تتصوّرشي اللـّي الجمعية هزّتْ معاها وفد بـ10 رؤساء جمعيات للقمة العالمية للتنمية المستديمة في جوهانسبورغ (جنوب إفريقيا، أوت-سبتمبر 2002) وما كلـّفتْ الدولة حتـّى ملـّيم، وشاركوا في القمة الرسمية وفي قمـّة الجمعيات، وساهموا في حضور تونس في هاك المحفل، وتكلـّمنا على مقترح الرئيس بن علي بـْخـْصوصْ الصندوق العالمي للتضامن... وسعادة السفير محمد الزين شلايـْفة وقتها شاهد... الحكاية طـْويلة...

المهمّ، وْخـَيـّانـّا وُوْخيـّاتـْنا القـْراوة هـُومـَا السـّببْ: لعـْبوا على ها المعطى هاذا مـْتاعْ بعض ناسْ كانت الجمعية مـْقلـّقتـْهـُمْ باشْ عمـْلو تعبئة سياسويـّة وضرْبوا الجمعية، يعني ضرْبوا القـِرْوان ومصلحة القـِروانْ ! استعملوا التـّـُهمْ، و'السياسة'، والقانون وأساليب الشـّواطن، والعياذ بالله... على مـُراد الله، ثمـّة ناس تـقـْرا القانون باشْ تولـّي تـِتـْخـُوبـِثْ بيه ويـَعـْمـْلو بيهْ الدّوسـِياتْ وتـْنفـّذ بيهْ أغـْراضـْها...

...يتبع.../  'ريـّانْ'.

تـِتـْصوّروشي اللـّي المؤسسات هاذي تعطي التمويلات هكـّاكة في طاعة الله وأكـْبـَرْ؟ تتصوروشي اللـّي ها المؤسسات تعطي على أساس العلاقات الشخصيـّة بين المسؤولين آكاهوْ؟ الأساس هو الخدمة والجدّية والمصداقية اللـّي، طبـْعا، العلاقات الشخصية وأسلوب التعامل والتواصل متاعْ المسؤول الأوّل لازمة، لأنـّو، نحبـّو ولاّ نكـْرْهو، لازم الأداء الاتصالي متاعْ المسؤول الأوّل يكون في شكل وأسلوبْ مـُعيـّنْ، وهاذا عـِلـْمْ، ما هوشْ خـُرّافْ.

ما نـْزيدْ نطوّل عـْليكـُمْ بـكـْلامْ، وقتلـّي عرفـْت اللـّي المسألة مـْصاتـِتْ وولاّ فيه تكمبين من داخل وقلـّة حـْياءْ من ناسْ كانوا تلامذتي أوْ أدمجـْتـْهـُمْ في الحياة الجمعياتية في القرْوانْ وخارج القِروان وبعثـتـْهـُم في التربصات والندوات الـْكـْبيرة في تونس وفي الخارج وبقيـّة أعضاء الهيئة ما خـْذاووشْ حتـّى موقفْ، قلتلهم في جانفي 2006 (في اجتماع الهيئة المديرة) "نـْعيـّنو رئيسْ آخر"، قالوا "لا، واصل" (الاجتماع هاذا حضـْرو فيه 12 من بين الأعضاء الـ16 للهيئة: العبدُلله، لعروسي الحطاب، يوسف خليف، يوسف النوري، روضة البليش، عفاف زدام، رفيقة البليلي، بوبكر دعدوشة، ظفر الله الكعبي، بلقاسم الخماري، السيد المهدواني، هندة البليش؛ أمـّا الكاتبة العامـّة ما كتبتـّوش في محضر الجلسة في دفتر المداولات !)...

وعاودـْتْ نفس الحكاية، يعني نفس المقترح وبكلّ إصرار في اجتماع مضيـّق (في مارس 2006) حاضر فيه العروسي الحطاب، ويوسف خليف، ويوسف النوري، وبوبكر دعدوشة، قالو "لا، واصلْ". واصلت، وهاوْ آشْ عملو من وراء الظـّهـَرْ (طبعا كنتْ نـتبـّعْ فيهم بالفـْتيلة، هوما والكاتب العام للجنة التنسيق مـْتاعـْهـُمْ واللـّي كان يدْعـَمْ فيهم، حتـّى من الخارج، إي نعمْ يا سيدي، في العاصمة وفي الخارجْ، يعني الخارجْ (يعني خارج تونس) ! راهو شيْ يـِتـْنـْسخْ في الكـْتـُب، نـْقولـْها ونـْعاودْ نـْقولـْها !).

آشْ عـْلينا: راهو هاذا الكلّ وما زلـْتْ ما قـُلـْتْ حتـّى شيْ في التكمبين الجماعي وعلى مستويات عالية ضدّ الفقير لله، القويّ بالله... موشْ مشـْكل. خلـّيني نكمـّل نعطي فكرة، لـِلـّي تـْحبْ تعرف وْللـّي يـْحـِبّ يـَعـْرفْ ويـْقـُضـّـُو فـِيَّ ويـْعاودو في الـ'كا سي بي' و'عَ المـُباشرْ' حول آشْ عـَمـْلـِتْ جمعية البيئة.

الجمعية هاذي كوّنتْ إطارات وخدْموا في مختلف المصالح، المركزية ولاّ الجهوية في الدولة: كانت الجمعية مدرسة لعامر الجريدي (اللـّي خـْدِم 7 سـْنينْ مستشار وزير البيئة مع 3 وزراء)، ونيّس الذويبي (اللـّي كان إطار في الشؤون الجامعية وتـْقاعـِدْ العامْ هاذا)، والسيد المهدواني اللـّي شدّ مدير إقليمي للبيئة (القيروان، القصرين، سيدي بوزيد) أكثر من 10 سـْنينْ، بدر الدين بنْ سعيد (اليومْ هانو مدير جهوي للشؤون الطالبية)، ونجيبْ عبانْ (عمل جمعية الفنانين التشكيليين، وتوّة مدير في إدار التربية)، وعبد الرؤوف الشواشي (عمل جمعية منتدى القيروان للآداب والموسيقى وكان رئيس مصلحة في جامعة القيروان)...

هاذا بـُخـْلافْ اللـّي خرّب الجمعية، بعـْد ما تعلـّم فيها 'الصـّنعة' وهو ياخـُذ في راتب مـُحـْتـْرَمْ، وعـْمل منها مشروع وربـّي يـْعينو، ويتشعبطْ من بلاصة لـِبـْلاصة يحبّ يوصل للبلدية، ومن بعد للبرلمان، ويوَلـّي يـُحـْكـُمْ في البـْلادْ، وفي بالو اللـّي بالاجتماعات الاستثنائية باشْ يحقـّق مقـْصـُودُو، وهو حاسبْ روحو هو أذكى الناسْ، وأقدر الناسْ، والناسْ الكلّ مـْسـَتــّكينْ، واللـّي قـْرا القانون ينجـّمْ يـْعـَدّيها على الناسْ الكلّ. الدّيويوْ ! القرواة ماهوماش خـْصيـّصينْ لَ ها الحدّ، خصوصا في الأمور متاع السياسية السياسوية، والوصولية، والتمقيصْ، و'التـّكـعـْبيرْ'، والفصالة والخياطة، والرقيمة والرّشيمة...؛ والتاريخ راهوا ما يـِتـْمـْسـَحـْشْ، وشيْ ما يقـْعـُدْ مـْخـُبـّي، وكيما يقولوها، وْيا ويلـِكْ وْيا طولْ لـِيلـِكْ يا فاعل الشرّ، و"الحـْسابْ تحت التوتة"...

...يتبع.../  'ريـّانْ'.

الجمعية هاذي دَخـّلـِتْ حواليْ مليارْ ما بين عام 1990 و2007. إي نـْعمْ ! ومنْ عند شكونْ؟ طبعا شويّ من عند الدولة (وزارات، دواوين، ولاية، بلدية...) والأغلبية من عند الصندوق الدولي للبيئة، والبنك العالمي، ومؤسسات ألمانية تابعة للحكومة، وسفارات الكندا وسويسرا وفنلندا، وخطة عمل البحر المتوسط (أثينا) التابع برنامج الأمم المتحدة للبيئة، وسكرتارية الأمم المتحدة لمكافحة التصحر، وشبكات جمعياتية بيئة أخرى...

تقلـّي إنتْ فاشْ تـْصرْفتْ الفلوس هاذيكا الكلّ: ندوات، مطبوعات، أجور، تجهيزات إعلامية ومكتبية، عربات (تراكتور جارّ ومجرور عند البلدية، مدرسة متنقلة 'فورقونات'، ماكينة كسارة قوارير بلاستيك، عربة ذات 3 عجلات 'تريسيكلْ'، مكتبة وأثاث...). آشْ هزْ منهـُمْ رئيس الجمعية معاه؟ برّة شوفو أشْ يمـْلكْ تاوْ تعرفوا ! ويقولو "سوء تصرّف" في ممتلكات الجمعية ! ثمـّة كلمة باهية برشة ديما يـْقولـْهالي السيد السبوعي ورثها على والدُو عليه رحمة الله: العار أطول من الأعمارْ !

نرجعو للـّي عـَمـْلـِتـّو الجمعية:

الجمعية هاذي نفـّذتْ زوز مشاريع في سيدي سعد (نصر الله): مشروع محمية التواتي، ومشروع التحكم في الطاقة المنزلية (الاقتصاد في الحـْطبْ)، ومشاريع تربوية، ومشاريع دراسية علمية، وبرنامج التصرّف في النفايات في حيّ المنصورة وفي بلدية عينْ جـْلولة، تركيز بوبالاتْ في المدينة، وعـمـْلتْ ندوات دولية كـُبـْرى موشْ أيّ مؤسسة تـْنـَجـّمْ تعمـَلـْها (التصحر، التنمية المستديمة، البيوتكنولوجيا)، وْساهمتْ في تجميل و/أوْ تشجير بعض المـْدارسْ والمعاهد (إعدادية المنصورة، معهد ابن الجزار، معهد دار الأمانْ مدرسة صبرة-المنصورة....) وحدائق في القروانْ. طبعا اللـّي ما واكبشْ نشاط الجمعية وقتها فاتـِتـّو حاجاتْ، لأن

الجمعية هاذي بعـْثـِتْ 45 قروي للخارج ! إيْ نـْعمْ، 45، فيهم أطفال، وفيهم شباب، وفيهم كهول، وفيهم نساء، وفيهم رجال. وكلّ شـْهرْ تقريبا تسمع بـْواحد في الخارج من القروان (وكان هاذاكا هدف بالنسبة ليلي وقت اللـّي ترأست الجمعية، خصوصا أنـّي مـُدرّس إنقليزية والعالم يتكلم إنقليزية...). آمـّا توّة؟ النـّسمة ! جمرة وطـْفيتـْها بالماء. بعض القراوة يقولو "الجمعية ولاتْ وكالة أسفار": معناها كيف يولـّي جمعية عندها اعتبار ومصداقية ويبعثولها تذاكر السفر ويخلـّصو عليها الإقامة حـْرامْ ! يا والله بـُغضْ فينا. هاذي، والله، والقرآن والرحمان، وهاني نكتب في ها السـّطورْ وآنا صايمْ على ريقي، قالوها بعد ما جيت من البرازيل في جوان 1992 من قمـّة الأرض الأولى. في عوضْ اللـّي المسؤولين (قادة القروان) والرّأي العام يفرحو ويفتخرو بمبادراتْ كيما هاذي، البعض منهم ما يعـْرفْ كانْ يـِتـْمقـْعـَرْ.

والكلام هاذا قالوه القـْراوة بعد زوز مشاركات دولية آكاهوْ وقتـْها: مشاركة أولى في أثينا، وهزّيتْ فيها معايا يوسف النوري، وعاونـّا الوالي سالم المكـّي بمنحة من الولاية بـ200 د وقتها باش نخلـّصو التسكرة متاعو (باعتبار أنـّو رئيس الجمعية مـِسـْتـِدعـِي وتـِسـْكـِرْتـُو وإقامتو خالصة) وسـكـّنتو في بيتْ الوتيل معايَ (على خاطر خالصة، كيما قلـْتْ)، ومن هاكْ الوقت وسي يوسف ولاّ خرّار مرّار على الخارج، ومرّة نسمعو قبل ما يخرج، ومرّة نسمعو بعد ما يخرج (وانعاودْ نقول الشهود موجودين على كلّ ما انقول، والشهود هوما اللـّي في محكمة الاستئناف ظـهـّروا الحقّ)... وهـْنا تفـْهمو علاشْ الناس حبـّوا 'يـْفكـّوا' رئاسة الجمعية ! يـِحـْسايـْبوها 'أوتوماتيكْ': اللـّي يشدّ مسؤولية الجمعية يضمنْ الرّحلات والسفرات والخرجات، ناسينْ ألـّـِي فمـّة قدرات اتصالية وعلائقية ومصداقية متاعْ أشخاص على دفـّة المسؤولية (يعني القيادة) ! الجهل مصيبة، وبرّة !

...يتبع.../  'ريـّانْ'.

شـفـْتو كيفاش القرْوي والقرْويـّة (أو البعض منـّا) اللـّي تولـِّي عندو أقلّ مسؤولية يـِسـْتـْبـِدّ ويستـْولـّى ويستـْهلـىّ ويـْولـّي ما عادشْ يـُغزرْ كان لـْمصلحتو ولـْنـَزَواتو وشهـَواتو؟ شـُفـْتو كيفاش ها المسؤولين السابقين في جمعية البيئة، ومنهم مسؤولين ('قادة') رسميين، أجرموا في حقّ القـِرْوان ! لأنـّو اِحنا نمـْشيو، لكن "المرءُ حديث بعده" (في حياته وبعد مـَماتـِه). يا وِيلـْهم ويا طولْ ليلـْهـُمْ، وكيفاش باش يلقاوْ قـْبوراتـْهـُمْ وتـْرابْ القـِرْوان سـْخونْ. الله يلطف بينا وبيكـُم وبأمـّة سيـّدنا محمـّد !

كـْفاهـُمْ على مـُولاهـُمْ، أمـّا الحقيقة لازمْ نـْظهـّروها، والباطل والكذب ما يحبـّو وما يـقبـْلو حتـّى حدّ (بـخـْلافْ بعض ناسْ). وخلـّيني نـْزيدْ نـْقـُلـّكـُمْ آشْ قالولي زوزْ من اللـّي عـَمـّلـْتْ عليهم في الجمعية (وكانوا أعداء لـِبـْعضـْهـُم وشيـّحـُولي ريقي (هذاكا يقـوللـّي عالآخر "تعيسْ"، والآخرْ يـْقـُلـّي على الآخر "ثعلب"، وآنا بينْ الإثنين نـْرادِعْ باشْ تمشي أمور الجمعية) ومنْ بعدْ اتحالفوا، إي نعمْ، تحالـْفو وعملو مخطط كامـِلْ بين القروان وتونس (كـُنتْ شالقْ بيهْ ونـْتبـّعْ فيه، بالطبيعة)، باشْ يـْهتـّكو الجمعية شـْماتة في رئيسها: واحد قالـّي، في آخر عام 2005 "خـَلـّي تـِتـْفـْلـَقْ" ! ولـُخرى قالتـْلي في الوسط الأوّل من عام 2006: "وْفـَاتْ لـ'أبناكْ'" (APNEK، يعني انتهـَتْ !)، ولا حشمة ولا جعـْرة ! كلاوْ الغلة وسبـّو الملـّة. خدمو وتـْكوّنو في الجمعية وْدخـّلناهم في منظمات وجمعيات أخرى، وخرْجو للخارج وبعض من أقاربـْهـُمْ زادة (لوزان، جنيف، برشلونة، نيويورك، القاهرة، مرسيليا، روما...) وشوفْ آشْ يخرجْ منهمْ في حقّ جمعية متاعْ القروانْ، ما هياشْ متاعْ رئيسـْها ولاّ متاع حدّ ! ويزيدو بعض القـْرواة يسمـْعو في الأكاذيب والإشاعات اللـّي يـْخرّجو فيها ويـْصـدّقوها ! ها هـُوّ 'الرّسمي' مالا، وبالشهود والوثائق والأحكام القضائية يا سيدي ويا مادامْ. وما ثمـّة حتـّى حدّ مـُلمّ بتاريخ الجمعية ورصيدها وقيمتها وإشعاعها كيف ها الفقير لله صاحب ها 'الملزومة'.

الحمد لله اللـّي قال "وقل جاء الحقّ وزهق الباطل إنّ الباطل كان زهوقا". واللـّي يحزّ في النـَفـْسْ، هو اللـّي الشيْ هاذا الكلّ ياقعْ في بـْلاد اسـْلام، وعاصمة الاسلام الأولى في شمال إفريقيا، والعاصمة الروحية للتوانسة الكلّ !

أيـّا يا سيدي؛ شدّ عندك: جمعية البيئة، وقعْ انتخابي رئيسها في 1990 وخذيت المقاليد على خالد الزوابي، الله يرحمو وينعـّمو (وقلتْ وقت اللـّي توفـّى توّة 5 سـْنينْ "خلـّى نـُقـْبـَة في الجمعية"، لأنـّو كان راجل قانون بالحق، وهـِيَ هـِيَ اَلاّ ما جاء شخص متاع قانون دخل في الجمعية كي الفارْ في الخابية ما عرفْ الاّ ما فسّدْها (ومانيش باشْ نـْقولْ راجل ولاّ مـْرا). وقـْتـْها في الكاسة متاعْ الجمعية 400د، وللأمانة، خالد (ثاني رئيس في الجمعية، يـَرْحـْمو ويـْنعـّمو) عطاها بـُعـْد آخر وتعلـّمتْ مـِنـّو برشة حاجاتْ، وكنتْ ديما نقولْ في ها الكلامْ في اجتماعات الهيئة وآنا رئيسها وخالدْ أمين مالْ، ومن بعد نائب رئيس... وقت اللـّي سلـّمـْتْ في رئاسة الجمعية بعد ما اطـْمـِنـْتْ وجـِبـْتْ هاك الـ'11' آوْتْ، كانوا زوزْ سـْفاراتْ يطالبو فينا باشْ نـُصـْرْْفو عشراتْ مـْلايـِنْ ما اتصرفتشْ باش يـْسكـّرو حساباتهم (على خاطرْ عام 2006 تـْعدّى في الصراعات الداخلية على حسابْ الخـِدمة واستيفاء الالتزامات).

وللحديث بقيـّة...

...يتبع... / 'ريـّانْ'.